Segurtasun Sailak emandako datuen arabera, 18:40ean eman zuten sutearen berri. Asteasu eta Andazarrateko gainaren artean kokatuta dagoen Amenabar baserriko tximiniak hartu zuen sua, baina segituan hedatu zen etxean zehar: bigarren solairura lehenengo, eta teilatura ondoren. Minutu gutxiren buruan teilatua erori zen.
Tolosako eta Zarauzko suhiltzaileak bertaratu ziren, eta Ertzaintzak trafikoa moztu zuen GI-2631 errepidean. 21:00ean itzali zuten sua, baina suhiltzaileek lanean jarraitu zuten sugar guztiak itzali arte.
Teilatuaz gain, bigarren solairuan ere kalte handiak eragin zituen suteak. Sua itzaltzeko erabilitako uraren ondorioz, lehen solairuan ere kalteak izan ziren.
Bi pertsonaren bizileku
Baserrian 35 eta 41 urteko bi pertsona bizi ziren, baina onik atera ziren. Pili Legarra Asteasuko alkatea ere bertaratu zen sutearen lekura, eta kaltetuei ostatu emateko gestioak egin zituen.