Karobiaren egoera txarra zela eta, Burdina Taldeak bere gain hartu ditu berreskuratze lanak. Joxe Mari Etxeberriak hitz egin du taldearen izenean eta ondare historikoa berreskuratzeak eta ezagutarazteak duen garrantzia azpimarratu du. “Merezi du Asteasuk bere ondarea zabaltzea. Datorren urtean beste ondare historiko bat proposatuko dugu eta gu prest gaude bide honetan lanean jarraitzeko”.
Hainbat datu eman ditu historialariak, besteak beste, karobi horretan 80 pertsona inguruk lan egiten zutela eta bertan bazegoela motore ekonomiko bat. “Historikoki ohartu gara karobi honetatik diru asko ateratzen zela”. Karobi industrial edo frantses karobi izenez ezagutzen dira Urzuriagakoa bezalako karobiak. “Etengabe funtzionatzen zuen. Zementoa egiteko erabiltzen zen, batez ere”.
Karobi honen ondoan, Asteasuko Julian Lizardiren jaiotetxea zegoen, gaur egun desagertua eta beste etxe batez ordezkatua. Baserriaren ondoan gaztainondo bat dago, eta han errezatzen omen zuen. Hortxe bertan dago Urzuriagako karobia. Taldeko kideak, Asteasuko Udaletxeko ordezkariak, Urzuriaga etxeko jabeak eta hainbat herritar izan dira aurkezpen ekitaldian eta hamaiketakoa egin dute ondoren.