Aurreko legealdian Asteasuko Udalak eskatuta zituen bi maileguei (694 mila eta 500 mila) aurre egin beharrean aurkitu zen udal gobernu berria 2011n. "Garai hartan onartuta zeuden konpromisoei, fakturei, erantzuteko beste 400 mila euroko mailegu bat eskatu behar izan genuen". Gainera, aurreko legealdian sinatutako hitzarmen urbanistiko bati zegokion epea ez betetzeagatik udalak 642 mila euroko isuna jaso zuen. Orotara, beraz, Asteasuk duela 4 urte zuen zorra 2,3 miloi eurokoa zen.
Hitzarmen urbanistikoaren konpromisoaren zati handienari aurre egingo dio udalak ordainketa eginez. Eta Asteasu Lantzenen jabetzakoa zen pabiloi baten salmentari esker lortutako 615 mila euroak eta udaleko aurrekontuen emaitza positiboaren bidez lortutakoak zorra murriztera bideratuko dira. 2015era beraz, bi mailegurekin iritsi da Asteasuko Udala, 918 mila euroko zorrarekin.
Udal gobernutik adierazi dutenez, "krisialdiaren eraginez ez zaigu garai oparoa egokitu kudeaketarako. Gastuen kontrol zehatza eraman dugu eta diru laguntzak lortu ditugu inbertsio berriak egiteko; iaz bakarrik, 24 diru laguntza lerro bideratu genituen".
Epe luzera begirako inbertsioak lehenetsi ditu Asteasuko Udalak azkeneko legealdian. "Ez dira egin begiz aise hautemateko inbertsioak baina bai herriko sektore guztientzat onuragarriak direnak". 2011-2015 epealdian herri bideak konpondu, egokitu eta osatzen, adibidez, ia 300 mila euro erabili ditu udalak.
| INBERTSIOAK 2011-2015 | |
| Planeamendu gastuak | 98.788 € |
| Herri bideak | 291.026 € |
| Gizarte Ongizateko proiektuak | 19.203 € |
| Turismoa lantzeko proiektua | 17.762 € |
| Ondare historikoa eta eraikinak | 201.913 € |
| Osasun arloa (ibilbide osasuntsua) | 23.073 € |
| Argiteria publikoa | 62.958 € |
| Hirigunea (Kale Berria) | 62.733 € |
| Ingurumena | 143.127 € |