Beteak beste, Matxintxulo izeneko parajea zeharkatzen du ibilbideak eta hortik hartu du izena. Pausoz pauso, Asteasuko ibilbide osasungarria inauguratu dute. Udalak, Eusko Jaurlaritzako Osasun sailak eta Osakidetzak hartu dute parte proiektu honetan. Eta herritarren iritziak ere hartu dituzte aintzat. Denen ekarpenekin osatu da ibilbidea eta prest egongo da erabiltzaile guztientzako.
2,8 kilometroko luzera du ibilbideak. Lege Zaharren enparantzan hasi eta erreka ondotik, Usarrabi pasealekutik, herri baratzetarainoko bidea egiten du. Handik Matxintxulora joaten da eta bidegorritik egiten du herriko kaskora buelta.
Bide hau aspalditik dago egina, baina ibilbide osasungarri bezala osatzeko hainbat azpiegitura jarri zaizkio: eserlekuak, iturriak, seinalizazioa, osasun ariketarako gunea eta atseden gunea adibidez. Pili Legardak, Asteasuko alkateak nabarmendu duenez, «Gipuzkoako Foru Aldundiaren laguntzarekin parte hartze prozesu bat jarri genuen martxan. Herriko hainbat eragilek egin dituzte ekarpenak, esate baterako, emakume taldekoek ibilbidean komunak behar zituztela esan ziguten eta haiei kasu eginaz jarri dira».
«Ahalegin handirik egin gabe eta herrian paseoan ibiliz osasunari mesede handia egin diezaiokegu». Horrela adierazi du Vitorio Tapiz herriko familia medikuak. Ahal bada arin ibiltzeko, oinetako egokiak erabiltzeko eta ura edateko gomendioak luzatu ditu ibilbidearen inaugurazio ekitaldian. «Bihotza sendoago edukitzeko, arteria-tentsioa jaisteko eta kolesterol eta azukre mailak neurrian mantentzeko balio du oinez ibiltzeak». Norabide berean hitz egin du Tomas Plazaola Tolosaldeko Osasun saileko arduradunak: «Ariketa fisikoak gorputzari bakarrik ez, buruari ere on egiten dio. Adineko jende asko dago bakarrik bizi dena eta etxetik ibilbide hau egitera ateratzeak jendearekin harremanetan jartzen lagun ditzake».
«Azpiegitura eginda dago, baina gero erabilera eman behar zaio», esan du Pili Legarra alkateak. Horretan ere pentsatu dute: astean behin ibilbidea elkarrekin egiteko irteerak antolatuko dituzte eta Isabel Dumall, herriko kirol teknikaria arituko da azalpenak ematen. «Jarri diren tresnak nola erabili ikasteko aukera izango dugu elkarrekin. Norberak ahal duen neurrian ariketa fisikoa nola egin dezakeen ikasiko du».
Udaberrirako ekintzak
Erabilera sustatzeko udalak txartelak banatuko dizkie herritarrei. Ibilbidea egiten den txanda bakoitzeko zigilu bat jasoko du parte hartzaileak eta hutsune guztiak betetzen dituenean sari bat jasoko du. «Gehienbat jubilatuengan pentsatuta osatu dugu ibilbidea eta beraz hauek urtean zehar antolatzen dituzten bidaietako batera dohainik joateko aukera emango zaio txartela osatzen duenari», adierazi du Pili Legarrak.
Ibilbidean zehar seinaleak eta panelak jarri dituzte eta horrekin batera, telefono interesgarrien zerrenda ere ikus daiteke ibilbidearen berri emateko banatu duten eskuorrian: udaletxea, osasun zentroa, farmazia, autobusak eta SOS Deiaken zenbakiak herritarren eskura.
Martxoaren 20an egindako inaugurazio ekitaldiaren baitan ariketa fisikoa egiteko aparatuak probatu, ibilbidearen zati bat egin eta mokadutxo bat jateko aukera izan zuten herritarrek. Aurrerantzean osasuna zaindu eta ibilbide berrian paseoan ibiltzeko aukera izango dute asteasuarrek.