Anoetako Udalak Telegram kanala jarri du martxan eta herritarrei bertara harpidetzeko deia luzatu die. Mugikorrean aplikazioa deskargatu nahi dutenek edo haren inguruko azalpena jaso nahi dutenek, udaletxe atarian dute horretarako aukera, gaur, 11:30 arte.
Udalak albiste eta kultur eskaintza guztien berri emango du kanal horretan, norberak aukeratzen duen hizkuntzan. Izan ere, aplikazioa tresna baliagarria da euskaraz ez dakitenek hainbat bilera, aurkezpen edo txaten jarraipena euskaraz egin dezaten. Aldi bereko itzulpenak modu errazean egiten dira Telegramen; norberak bere mugikorra erabiltzen du entzungailuekin, maleta eta petakak erabili beharrean, eta mezuak ere, euskaraz idatzita egon arren, nork bere hizkuntzara itzulita irakur ditzake txatean.