Elkartu Gipuzkoako desgaitasun fisikoa duten pertsonen federazioak helegitea aurkeztu dio Anoetan sustatutako 18 udal etxebizitzen promozioari, bertan etxebizitza egokiturik aurreikusten ez delako.
Aukerako berraztertze-errekurtsoa aurkeztu du, hain zuzen, Lasarbe 14. eremuko partzelan 18 udal etxebizitza tasatu zozketa bidez esleitzeko Anoetako Udalak egindako deialdiaren aurka, uste baitu sustapen horrek, praktikan, mugikortasun murriztua duten pertsonak kanpo uzten dituela.
Elkartuk salatzen duenez, proiektuak hainbat solairutan banatutako 18 etxebizitza aurreikusten ditu, baina ez etxebizitza egokiturik. «Horrek esan nahi du gurpildun aulkia erabiltzen duten pertsonek edo mugikortasun zailtasunak dituztenek ezin dutela baldintza berdinetan tokiko administrazioak bultzatu eta, beraz, izaera publikoko sustapen batean etxebizitza eskuratu».
Elkartuk azpimarratu duenez, Irisgarritasuna Sustatzeko legeak honako hau ezartzen du: «Babes ofizialeko etxebizitzen sustapenetan, mugikortasun urri iraunkorra duten pertsonentzat, etxebizitza bat gordeko da hogeita bost edo frakzio bakoitzeko».
Horregatik, Elkartuk Anoetako Udalari deialdia aldatzeko eskatu dio, gutxienez mugikortasun murriztua duten pertsonentzat egokitutako etxebizitza bat txerta dadin, udal etxebizitzetara benetako eta eraginkorra izango den sarbidea bermatuz, bazterkeriarik eta diskriminaziorik gabe. Era berean, argitu du irisgarritasuna oinarrizko printzipioa izan behar dela edozein etxebizitza politika publikotan.