Anoetako Udalak zaintza-plana lantzen ari da, gaur egungo herriko zaintza egoera aztertu eta kudeaketarako bide orria osatzeko. Zabalduz izeneko enpresarekin elkarlanean ari dira prozesua gidatzen.
Lehenengo fasean, maiatz aldera, Anoetako zaintza diagnostikoa egin eta egitasmoaren oinarriak jarri zituzten, eta horrekin batera, ildo nagusiak zehaztu zituzten.
Prozesu parte hartzailea izango da hemendik aurrerakoa eta bertan arituko dira herriko hainbat eragile eta norbanako, aurretik zaintzaren inguruko mahaian parte hartu dutenak. Anoetan elkar zainduz prozesuan eragile publiko zein pribatuek hartu dute parte.
Aurrera begira, 2026an, bi zaintza topaketa antolatu dituzte. Lehenengo saioaren data aurreratu dute dagoeneko: urtarrilaren 27an Lasarbe aretoan bilduko dira 17:00etan. Udalak herritarrak gonbidatu ditu bileran parte hartzera.