Anoetan euskalduntasunetik kulturartekotasuna eraikitzeko egitasmoa jarri zuten martxan iaz UEMAk, Anoetako ikastolak eta Anoetako Udalak. Urtebete baino gehiago daramate elkarrekin lanean eta, orain, proiektua herritar guztiei zabaldu nahi diete. Horretarako bilera ireki bat egingo dute irailaren 17an, asteazkena, 18:0etatik 19:30era, Lasarbe kaleko erabilera anitzeko gelan, liburutegi ondoan.
Euskara eta kulturartekotasuna Anoetan proiektuak bi helburu ditu: euskara komunikazio-hizkuntza izaten jarraitzea eta, aldi berean, jatorri atzerritarreko herrikideen ulermena erraztea eta haien parte hartzea sustatzea. Horretarako aldaketa batzuk egingo direla jakinarazi dute egitasmoaren bultzatzaileek: «Aldaketaren protagonistak herritarrak zarete. Proiektuaren oinarriak eta egingo diren aldaketak azaltzeko zein horien inguruan elkarrekin pentsatzeko eta hitz egiteko Anoetan egingo den saiora gonbidatu nahi zaituztegu».
Herritar guztiak azaltzea «funtsezkoa» dela esan dute bultzatzaileek, «erabakiak hartu eta aurrera jarraitu ahal izateko». Zaintza eta itzulpen zerbitzua egongo da bileran .