14. zenbakiko elastikoa eramango du etapa berri honetan futbolari anoetarrak. Emakumezkoen futbol eliteko arduradun Maider Castillo eta emakumezkoen futbolaren arduradun Garbiñe Etxeberriarekin batera, Intzak Klubarekin lotura berria sinatu du Reale Arenako estadioan.
Anoetako jokalari gaztea harrobiko ibilbidearen eredu dela azaldu du Realak. Intza izan da lehen jokalaria hiru emakumezkoen taldetatik igaro ondoren lehen taldean debuta egin duena: hirugarren taldean hasi zen, bigarrenera igo eta orain lehen taldean aritzeko aukera izango du. «Bere konpromisoa, lana eta etorkizun oparoa erakusten dituen ibilbidea da honako hau», azaldu dute klubetik. «Nortasuna, grina eta talentuarekin, Intza Egiguren etorkizun handiko jokalaria da Realarentzat. Etengabeko hazkundea izan du eta merezimenduz iritsi da eliteko taldera. Orain, bere balioa lehen mailan erakusten jarraitzeko prest dago».
Intza Egigurenek azaldu duenez, «askotan amesten duzun gauza bat da, txikitatik Realekoa izanik, are gehiago. Niretzat ohore bat da Realeko lehen taldeko parte izatea. Oso gustura nago, eta denboraldiaurreari begira dagoeneko».