Anoetako 339 etxebizitzek % 10eko hobaria jaso dute 2025eko lehen hiruhilekoko hondakinen tasan, auto-konposta edo auzo-konposta proiektuetan parte hartzeagatik. Sarraila elektronikoaren sistemari esker, proiektuan izena emandako 367 etxebizitzetatik zenbatek parte hartu duten egiaztatu ahal izan du udalak, eta horietatik 339k baldintzak bete dituztela baieztatu du.
Hobaria aplikatuta, parte hartzaileek guztira 38.385 euroko tasa ordaindu dute, aurreikusitakoa baino gutxiago, konpostajea bezalako praktika jasangarriak bultzatu dituztelako.
Anoetako Udalak azpimarratu du halako ekimenek herritarren «konpromisoa eta jarrera arduratsua» eskatzen dutela, eta nabarmendu hondakinen kudeaketa egokia «ezinbestekoa» dela bai ingurumenaren zaintzarako, bai klima larrialdiaren aurrean ekarpen eraginkorra egiteko. «Herria garbi eta txukun mantentzeko funtsezkoa da auzotarrek duten inplikazioa», gaineratu dute udal ordezkariek.