Anoeta Herri Hezitzailea taldeak Altxa Burua kanpainaren inguruko bilera irekia antolatu du ostegunean, otsailaren 20an, udaletxean. Azken asteetan gaiari buruzko hainbat hausnarketa egin dituzte herrian: hilabete batez hainbat bideo zabaldu dituzte eta Tolosa eta Berrobi herrietako esperientziak ezagutu ondoren, kezkak partekatu dituzte. Anoetan egin dezaketenaren inguruan hitz egin nahi dute osteguneko bileran eta 18:00etatik aurrera bilduko dira horretarako.
Anoeta Herri Hezitzailea taldea 2022an sortu zuen herritar talde batek, zeinak uste baitzuen haur eta nerabeen aisia eta hezkuntza beste era batera uler zitezkeela; ikuspegi integrala landu dute denbora honetan, komunitatean fokua jarrita eta hezkuntzaren ardura eskola eta familia eremutik harago ulertuta. Anoeta eremu hezitzailea dela eta bertako herritarrak eragile hezitzaileak direla sinesten dute taldean.
Oinherri Herri Hezitzaileak Sustatzeko Elkartearen aholkularitza ere jaso dute taldekoek eta haien zazpi oinarriekin bat egin dute: jolasa eta sormena ikasteko eta garatzeko berariazko tresnatzat dituen haurren eta nerabeen kultura aitortzea; haurrei zein nerabeei benetan parte hartzeko eta erabakitzeko ahalmena ematea; eurek eraikitako aisia hezitzaile eta euskaldunaren bitartez, aniztasunean berdin eta parekide izanez eta ingurumen naturala eta kulturala zainduz, komunitate-sarea eta auzolana indartzea, eta pertsonen arteko harreman osasuntsu, justu eta asegarriak jostea.
Bide honetan, Anoetako Udalarekin eta Anoetako Herri Ikastolarekin harremanak izan ditu taldeak eta eragile hauek ere proiektuaren parte izatera pasa dira. Taldea sortu zenetik hainbat proiektutan parte hatu du Anoeta Herri Hezitzailea taldeak: udalarekin batera aisialdi guneko parte hartze prozesua sortzen eta aurrera eramaten aritu dira; herriko eskola kirolaren inguruan zenbait hausnarketa egin dituzte; eta herriko hainbat festen antolaketan euren balioak presente egon daitezen lan egin dute.
Orain Altxa Burua kanpainarekin bat egin du taldeak eta orain arteko hausnarketak herritarrekin partekatzeko bilera irekia egingo dute, ostegunean, 18:00etan, Anoetako udaletxean.