Hamazazpigarren aldiz ospatu dituzte Euskal Jaiak Anoetan. Urtero bezala, azoka izan dute goizean, eta gertuko ekoizpenak eta ekoizpen ekologikoak hartu dute protagonismoa baserritarren eta artisauen azokan. Erdiko postuan, berriz, burdina eskuz lantzen duen Forjas Brun familiako kideak egon dira erakustaldia egiten. Izan ere, aurten burdina izan da Euskal Jaietako ardatza, eta horrekin lotutako beste hainbat ekitaldi ere izan dira tartean.
Esaterako, goizean zehar haurren eta helduen toka txapelketak izan dira, hauek ere burdinarekin lotura baitute. Eguerdian, berriz, ardo dastaketa egin dute Nafarroako Mendiko upategiko ardo ekologikoarekin eta txekor pintxoak dastatzeko aukera ere izan dute bertaratu direnek.
Azoka bukatuta, bazkariaz gozatzeko aukera izan dute herritarrek.