Hondakinen bilketaren inguruko urteko lehen erdiko datuak jaso ditu Anoetako Udalak eta gaikako bilketak gora egiten ari dela nabarmendu dute udal ordezkariek. Iaz %75,81ekoa izan zen gaikako bilketa, auzo eta auto-konposta datuak kontuan hartu gabe. Honenbestez, udalak datu «onak» jasotzen ari direla aipatu du: «Gutxi batzuen arduragabekeriagatik askotan kaleak zikin ikusten ditugun arren, anoetarren gehiengoak ardura eta konpromisoa erakusten du hondakinen gaikako bilketarekin».
Bilketa datuen berri ematen duen taula eman du ezagutzera udalak. Ekainean beherakada ikusten da, baina udal ordezkariek argitu dute hori beiraren bilketa datuak sartu gabe daudelako dela.
«Anoeta ondo egiten ari da, anoetarrak ondo egiten ari dira eta gauzak hobeto egin ahal izateko bitartekoak jarriko ditu udalak», nabarmendu dute ordezkari politikoek.