Korputs jaietan izandako giro «ederra» nabarmendu du udalak

Igo da kukua, ostera, kanpandorrera, Anoetako Korputs jaiak amaitu diren seinale. Hainbat egun igaro dituzte jai giroan anoetarrek, tartean bi asteburu, eta udalak balantze ona egin du, festa «ederrak» izan direla azalduz.

Herritarren eta eragileen lana eta parte hartzea azpimarratu du udalak, «horri esker egitarau anitz eta oparoaz gozatu ahal izan baita». Era berean, Anoetako jaiak aurrera ateratzeko beste behin beraien ekarpena egin duten herritar, eragile eta elkarte guztiei eskerrak eman dizkie: «Zuen laguntzarik gabe ez litzateke posible izango horren jai parte hartzaile eta herritarrak aurrera eramatea».

Hala, Anoetako Udaletik lanean jarraituko dutela esan dute, «udalaren, herritarren eta herriko taldeen arteko sareak ehunduz, Anoeta dinamiko eta parte hartzaile bat eraikitzen jarraitzeko, denon artean merezi dugun Anoetan bizitzeko». Herriko jaiak bukatu badira ere, ohi bezala, sanjoanen bueltan festa giroa itzuliko da berriro ere herrira.