Anoetako udal gobernua lau urteetarako gobernu plana prestatzen ari da eta azaroaren 29an aurkeztuko du herritarren aurrean. Egoitz Luisa alkateak adierazi duenez, herritarren bizi-kalitatea hobetzea da planaren helburua; "hori da udal gobernuaren lehentasun nagusia", esan du.
Alkatearen esanetan, udal gobernuak badu herritarren beharren ezagutza zehatza eta badaki nola egin behar duen lau urteotan: "Guretzat funtsezkoa da herritarrekin batera elkarlanean aritzea, horrela ulertzen baitugu egin behar dela herrigintza, horrela asmatuko baitugu ongizatean sakontzen".
Luisaren iritziz, udal gobernuak baditu ideiak eta baditu proiektu garrantzitsuak esku artean eta horiek guztiak islatuko dituzte gobernu planean. "Jasoko diren neurriek herriguneari nahiz landa eremuari eragingo diete, haur, gazte zein pertsona helduei, bertakoei eta bertaratutakoei. Ekonomia arlokoak izango dira neurri batzuk, hirigintzarekin lotutakoak beste batzuk, garbitasuna kontuan hartuko da, aisialdia, nagusien beharrak, euskara, genero politikak, feminismoa, ingurumena...".
Gobernu plana orain argitara emango den arren, alkateak nabarmendu du ekainean gobernu ardura hartu zutenetik lanean aritu direla, eta besteak beste, farmazia elkargoarekin hitzarmena sinatu dutela etxez-etxeko laguntza zerbitzuko erabiltzaileen eta gizarte zerbitzuek artatutako pertsonen artean botiken erabilera optimizatzeko programa garatzeko. Era berean, kiroldegian hainbat doikuntza egin dituzte eta Lasarbeko errekan babes hesia jarri dute. Irakin proiektuarekin ere hitzarmena sinatu dute herritarrei sukaldaritza ikastaroak eskaintzeko eta egoera zaurgarrienean dagoenari laguntzeko, larrialdietarako udal etxebizitzaren erabilera aratu dute.
Anoetako udaletxean egingo dute aurkezpena, asteazkenean, 19:00etan.