Anoetako Udalak Modestoenea etxearen jabetza eskuratu du. Urte amaieran, udal talde osoaren adostasunarekin hartu zuten erabakia eta erosi dute jada. Eraikina eskuratzeko 450.000 euro ordaindu ditu udalak.
Modestoenea eskuratzearen helburu nagusia da Anoetako herri ondarea babestea, izan ere, balio sentimental handia du herritarrentzat, udalak esan duenez. «Aisialdirako elkargunea ere izan da hainbat eta hainbat belaunaldirentzat», gehitu du. Udalak esan du aurrera begira irekita daudela ate guztiak eta herritarrekin batera hausnartu nahi dutela zein funtzio izango duen eraikinak etorkizunean; «hori lortzeko modua parte-hartze prozesu bat abiatzea izan liteke, beste hainbat gairekin egin izan den moduan».