Ibilbideak 12 kilometro ditu eta Lizarbakarreraino igo eta jaitsiko dira lasterkariak, 758 metroko desnibel positiboa eginez. Ibilbidea hasiera partean zein bukaeran bera izango da, eta igotzerakoan Urkizuko antena paretik joango dira, eta jaisteko pistatik joango dira, Fraileburutik igarota.
Ane Aranburu antolakuntzako kideak azaldu duenez, Gazte Koordinadora Sozialistan (GKS) aisialdiri buruz egindako hausnarketatik sortu da mendi lasterketa antolatzearena: «Ikusten genuen aisialdia orokorrean lan indarraren erreprodukziora bideratuta. Hau da, orokorrean, aisialdian behar sozial batzuk betetzera bideratuta geundela, gero berriz lanera atseden hartuta bueltatu eta indarrarekin itzultzeko. Gizarteak bultzatzen duena aisialdi eredu kapitalista dela ikusten dugu, eta hortik aterako litzatekeen zerbait antolatu nahi genuen». Eredu kapitalista esaterakoan, «orokorrean kalera atera eta sozializatzeko tabernan kontsumitu egiten dugula, edo kirola egiteko kiroldegian izena ematen dela. Hau da, dena orokorrean diruaren menpe dagoela», zehaztu du Aranburuk. Beraz, mendi lasterketa hori antolatzearekin gazteei ikusarazi nahi die aisialdiaren inguruan egiten duten irakurketa, eta, bestetik, kirola egiteko zein sozializatzeko beste modu batzuk eskaintzea.
Mendi lasterketaren ondoren, bazkaria egingo dute Anoetan bertan, baina horretarako izena emateko epea bukatu da. Mendi lasterketan parte hartzeko izena emateko galdetegi bat prestatu dute eta beraien sare sozialetan aurkitu daiteke lotura. Bestalde, egunean bertan ere izena emateko aukera izango da.