Anoetako herri-bideen inbentarioaren behin-behineko proposamena irekita izan dute herritarrek azkeneko asteetan eta ekarpenak jaso ondoren aste honetan onartu dute behin-betikoa.
Pello Estanga alkatea asebeteta azaldu da herritarren erantzunarekin: “Gutuna jaso duten herritarren erdia etorri da behin-behineko proposamena ikustera; eta interesa duten seinale da hori”. Inbentarioa abiapuntua izango da, behin hori eginda, udalak tresna bat gehiago baitu herri-bideak ordenatzeko eta erabilera zein mantenua erabakitzeko.
Etorkizunera begira zabalik dago aukera bide berriak sortzeko, eta baita zaharrak berreskuratzeko ere; horren adibide da, urteetan galduta egon ondoren, joan den astean sasiak kenduta berreskuratu zuten Anoeta-Hernialde-Alkiza herri-bidea.
Zehaztasuna helburu
Lursailen geo-lokalizatzeko prozesua martxan jartzeko asmoa du Anoetako Udalak. Herri-bideen inbentarioa egitearekin batera, lurraldearen kudeaketarako tresna eraginkorra izango da herriko lursail guztien mugak geo-lokalizatzea. Hainbat onura ditu egitasmoak, kasurako, jabe bakoitzak lurraldearen mugak zehaztasunez ezagutzea, belaunaldi artean jakintzaren transmisioa bermatzea eta katastroa eguneratzea.
Lanketa egiteko esleipen prozesua martxan jarriko du udalak, eta horretarako 48.400 euroko inbertsioa egingo du. Era berean, lanketa egiteko 10.000 euroko diru laguntza jasoko du udalak Gipuzkoako Foru Aldunditik.