Bost bikotek parte hartu zuten larunbatean Markinako III. Helduen trikitixa txapelketan, eta epaimahaiak horrela erabakita, Xabier Etxanizek eta Ainara Saizarrek irabazi zuten sariketa. 1.000 euroko saria eraman zuten etxera. Soinu jotzaile azkoitiarrak eta pandero jotzaile aiarrak bigarrenez jantzi dute Markina-Xemeingo lehiaketako txapela, sariketaren lehen edizioan ere haiek izan baitziren txapeldun. Ohi modura, irabazleen doinuz amaitu zen txapelketa. Horren aurretik hitz batzuk esan zituen Etxanizek, lagunen eta etxekoen babesa eskertzeko, eta amari eskaini zion garaipena.
Etxanizek eta Saizarrek 758,5 puntu eskuratu zituzten. Haiengandik 49 puntura geratu ziren Andoni Oruesagasti eta Uxue Kerejeta (709,5) eta hirugarren sailkatuak Leire Zumeta anoetarra eta Amaia Arza añorgatarra izan ziren (673,5). Txapelketan eskaini zuten piezetako bat da Zuei trikitixa. "Hainbeste gustatu zitzaizkigun eta hain identifikatuta sentitzen garen hitzak Beñat Gaztelumendirenak dira", esan dute Zumetak eta Arzak. Bien seme-alabei eskaini diete trikitixa:
Txapelketan laugarren sailkatuak Mirari Azkune eta Aintzane Agirrebeña (648) izan ziren, eta bosgarrenak, Laja II. eta Lutxurdio.
Bideoa: Ana Kristina Aramburu