Julen Iztueta artista anoetarraren artelanak dagoeneko itsatsita daude Hanburgoko kaleetan, eta ofizialki hilaren 21era arte irauten du. Baina kartel horiek luzaroan iraun dezakete kalean itsatsita, kontuan izanik Art Off Hamburg ekitaldiak irailaren lehen astera arte iraungo duela. Guztira 200 kartel itsatsi dira, collage bakoitzetik launa, A2 eta A1 tamainetan. Artea kalera ateratzea da kultur egitasmo horren asmoa, artelanak, kontzertuak, ikuskizunak, dantza eta literatura uztartuz, eta horren barruan kokatzen da Iztuetaren erakusketa. Artistak datorren astean Hanburgora joateko asmoa du, bere erakusketak izan duen harrera bertatik bertara jasotzeko.
Ispilu hutsak bilduman, "gatazkan dauden pertsonaiak" aurkezten dira, esan du Iztuetak, "begirada autorreflexiboa proiektatzen duten gorputz hautsi eta zatikatuak". Hainbat urtez zehar bildu, moztu eta nahasitako irudien bitartez sorturiko gorputz hustuak eta berrosatuak ageri dira bertan.
Julen Iztueta Anoetan jaio zen, 1987an. Arte Ederrak Bilbo eta Bartzelona artean ikasi eta orain Vilanova i la Geltrú-n (Bartzelonan) finkatua dago. Diseinatzaile grafiko moduan lan egiten du eta TecnoCampus unibertsitatean (Pompeu Fabra) irakasle ere bada. Arte Ederrak amaitu zituenetik irudiak sortzen jarraitu du baina azken urte eta erdian bereziki murgildu da zeregin horretan. "Giles Lipovetzky, Joan Fontcuberta edo Guy Debord-en idatziak uztartzen ditut nire buruan eta honek nire sormen lanetan nolabaiteko isla duela pentsatzea gustuko dut", azaldu du Iztuetak.
Julen Iztueta artista anoetarra