Herriko plazan deialdia egin ondoren, adin guztietako jendea elkartu eta batera egin dute gaztetxerako bidea. Bertan, taldetan banatu dituzte eta bisita gidatuari hasiera eman diote. Eraikinaren barruan, alde batean zegoen pareta bota egin dute, eta alde horretan bi espazio atondu dituzte: liburutegia eta sukaldea. Hor zeuden entseguetarako bi espazioak goiko solairuan egokitu dituzte. Horrez gain, komuna ere jarri dute solairu horretan, eta behe solairuan dagoen komuna berritu egin da. Musika grabatzeko estudioa ere jarri dute, sarreraren ondoan. Obrak aurrera emateko Anoetako Udalaren laguntza jaso dute. Kanpoaldean ez da obrarik egin, baina bisitariek aurreko urtetik Gaztetxekoek martxan duten baratzea ikusteko aukera izan dute.
Urtemugako ekitaldiek jarraipena datorren asteburuan izango dute. Zehazki, apirilaren 24ean, Nhil band eta Belak taldeen kontzertua izango da, 18:00etan hasita.