Anoetako Udalak ohar batean COVID-19ak eragindako pandemiari egin dio erreferentzia, Emakumeen Nazioarteko Egunaren testuinguruan: "Krisi multidimentsional eta sistemiko bat bizi dugu, aurrekaririk gabekoa, lehendik zetozen beste krisi batzuekin gurutzatzen eta lotzen den krisia, hala nola, krisi ekologikoarekin eta zaintza-krisiekin".
Feminismotik aspaldi aldarrikatzen ari zena agerian utzi duela uste dute Anoetako udal ordezkariek eta esan dute ezerk ez duela bizitzaren zaintza baina garrantzitsuagoa izan behar. "Pandemiarekin zaintza muturreraino ahuldu eta prekarizatu den honetan, bizitzari baldintza duin eta justuetan eustearen aldeko apustu erradikala egiteko unea da". Horregatik, eta emakumeen eskubideetan atzerapenik gertatu ez dadin, inoiz baino premiazkoagoa ikusten dute genero ikuspegia eta ikuspegi intersekzionala txertatzen duten neurri feministak hartzea.
"Irtenbidea ez da pandemiaren aurreko egoerara itzultzea, emakume gehienek lehenago ere bizi baitzuten diskriminazioa eta eskubideen urraketa: orain da unea pandemian areagotutako larrialdiei erantzuna emateko, eta, aldi berean, guztiontzako bizitza duina bermatzea eta zaintzea lehentasuntzat joko duen antolaketa sozial, ekologiko eta ekonomikoko sistema bateranzko oinarri sendoak ezartzeko", esan dute.
Uste berekoa da Pello Estanga alkatea ere: “Egun honek balio behar du udal honek politika publiko-komunitario feministekin duen konpromisoa berresteko, krisiaren ondorioen larritasunaz ohartzeko eta erdigunean bizitza zainduko duen gizarte-eredu baterantz joateko”.