Astelehenean ospatuko da Emakumeen Nazioarteko Eguna, eta besteak beste, gaur goizean Euskal Herriko Emakumeen Mundu Martxaren V. Nazioarteko Ekintzaren amaiera ekitaldian egindakoa irudikatuko dute. Irun eta Hendaia arteko mugan egin bezala, elkarretaratzea egingo dute Anoeta eta Irura elkartzen dituen zubian.
Anoetarrek, gainera, era guztietako aldarriz betetako oihalak eramango dituzte elkarretaratzera. Arratsaldean aritu dira mezu horiek idazten. Besteak beste, "dena aldatu, sistema arrakalatu", "atzerritartasun legeari sua!" edota "zubien gainetik, mugarik ez" mezuak irakur zitezkeen. Horrez gain, herriko plaza irudi ezberdinekin apaintzeko aprobetxatu dute.
Bihar gainera, eta eskualdeko mugimendu feministek iaz abiatutako ekimenari jarraituz, ekitaldi sinbolikoa egingo dute Laumugarrieta gainan, Anoeta, Amasa-Villabona, Asteasu eta Zizurkil herriek muga egiten duten tokian. Anoetarrek hartu zuten koadernoa, eta asmoa, urtero herri bateko asanbladak beste bati ematea zenez, bihar egingo dute lekuko aldaketa hori; Amasa-Villabonako herritarrek hartuko dute koadernoa.