Datozen lau urteetarako lankidetza hitzarmena sinatu dute Anoetako Udalak eta Anoetako Herri Ikastolak. Herriari kalitatezko heziketa-aukera ematea helburu, bi erakundeen arteko jarduera osagarriak bideratzeko oinarrizko lan ildoak zehaztu dituzte. Hitzarmenaren bitartez lankidetza teknikoa eta ekonomikoa arautu dituzte, baita jarduerak eta proiektuak finantzatzeko diru laguntzak emateko baldintzak ere.
Pello Estanga alkateak adierazi duenez, herriko ikastetxe bakarrak zerbitzu integrala ematen dio herriari eta harekiko apustua egitearen aldekoa da: “Hitzarmena bi aldeontzako da onuragarria. Hainbat urte daramatzagu lankidetzan, baina akordio idatziaren bitartez datozen urteetarako konpromisoa ere formalizatu dugu”.