Gaur egun 21 dira larriki gaixo diren euskal presoak. Preso hauek pairatzen duten gaitzari ezohikoa den espetxe politika baten baitan egin behar diote aurre Tolosaldeko Sarek esan duenez, "espetxeak berak osasunaren zaintzari dagokionean sortzen dituen zailtasunei, bestelako batzuk gehituz". Tartean, gaixotasunaren jarraipena egiteko konfiantzazko medikurik ez izatea edota lege arruntak jasotzen duen moduan gaixotasunaren larritasunaren aurrean etxean artatua izateko eskubidea ukatua izatea aipatu ditu Sarek.
Espetxeetako osasun baldintza kaxkarrak, gaixotasunari aurre egiteko aukera murritzak eta behar bezalako osasun zerbitzu baten falta nabarmendu ditu presoen eskubideen aldeko sare herritarrak eta honenbestez salbuespen politika hau desagertzen ez den bitartean larri gaixo diren presoak, "heriotzara kondenatuak" izaten ari direla nabarmendu du.
Salbuespeneko espetxe politika honekin amaitzeko aldarriarekin bat egitera deitu du Sarek, "espetxea ere gure gizartearen zati izanik, guztion ardura baita larriki gaixo diren presoek bizi duten muturreko egoera aldatzea".