Oporrak Bakean egitasmoa udako ezinbesteko osagaietako bat da, aspaldion, Tolosaldean. Haur sahararrek errefuxiatuen kanpamenduetako tenperatuta altuak jasan behar ez izateko eta mediku azterketak pasatzeko baliatzen dituzte, besteak beste, bizpahiru hilabeteok, eta Tolosaldea Sahararekin elkartea nahiz haiekin bat egiten duten familiak dira hori guztia ahalbidetzen dutenak. Gaur, urteroko agur festa ospatzen ari dira, urtero bezala, azkena izan dadila pentsatuz.
Kontraesan horixe baitu sahararren eta eskualdeko herritarren artean sortua den zubiak: batera senti daitezke elkar ezagutu izanaren poza, eta haur sahararrak Euskal Herrira gehiago bidaiatu behar ez izateko nahia.
Gaur, dena den, malenkonia guztiak aparte utzi, eta gozatu nahi duten guztientzat lekua egin dute Anoetan. Gaztetxoenek puzgarriak, futbolina, gena tailerrak eta margoak izan dituzte, eta haima ere zabalik izan da, sartu nahi izan duenarentzat. Eguerdi aldean ekitaldi politikoa egin dute, Mendebaldeko Sahararen askatasuna aldarrikatuz, eta guztiek elkarrekin bazkalduko dute, gero, paella, pilotalekuan. Arratsaldean, berriz, aparra, txokolatea eta musika izango dituzte.
15:30. Apar festa.
16:30. Ikuskizuna.
17:30. Txokolatada.
18:00. Saharar musika: Dagja Med Salem Band