Herriko txistularien kalejirak eman dio hasiera Anoetako Euskal Jai egunari. Eguraldiak lagundu ez duen arren, festak ez du hutsik egin, eta frontoia moldatu dute azoka jarri eta beste ekitaldiak egiteko. Urtero, gai baten bueltan antolatzen dute eguna, eta aurten, ahozkotasunaren inguruan egin dute. Hala, eguerdian, ahozko ondarearen transmisioa irudikatzeko ekitaldia egin dute: bertsotan, kantuan, eta Anoetak urte guzti hauetan izandako bilakaera azaltzeko kontuetan aritu dira hainbat herritar.
Bien bitartean, inguruko baserritar eta artisauek azokako postuak jarri dituzte eta ardo dastaketa ere egin dute. Eguerdian, herri bazkaria egin dute, eta menua ahalik eta gertukoena izan dadin saiatu dira, horretarako, herriko baserritarren eta Euskal herriko ekoizleen produktuak erabili dituzte. Eguna borobiltzeko, bertso saioa izango da 18:00etan Bidegain etxean, eta bertsotan Maialen Lujanbio, Andoni Egaña, Iker Zubeldia eta Anjer Mari Peñagarikano arituko dira. Ondoren, Kupela taldeak erromeria eskainiko du eta Anoetako talogileek egindako taloez gozatzeko aukera izango da.