Emakumea Master Cup lau t´erdiko eskuz banakako urriaren 21ean jarri zuten martxan 77 parte hartzailerekin; bigarren jardunaldiko partidak jokatu dituzte gaur Anoetan.
Elite mailako pilotarien arteko jaialdia izan da eta hiru triangular jokatu dituzte –laugarrena bihar jokatuko dute 21:00etan, Anoetako pilotalekuan–.
A taldetik, Miriam Arrillaga eta Leire Etxanizek elkarren aurka jokatu dute, baina zuzenean sailkatu dira hurrengo fasera; izan ere, Patri Espinarrek ez du jokatu lesioagatik. B taldetik, berriz, Leire Garaik eta Arrate Bergarak egin dute aurrera, eta C taldetik, Maider Mendizabal anoetarrak eta Maddi Mendizabalek. Miren Larrarte bidaniarrak talde honetan jokatu du baina galdu egin ditu bi partidak; beraz, ez du aurrera egin.
E taldeko pilotariek –Maite Ruiz de Larramendi, Olatz Ruiz de Larramendi eta Ainhoa Garmendia alegiarrak– bihar jokatuko dute triangularra. Jardunaldi honetatik sailkatutako biek ere azaroaren 11n jokatuko diren final-laurdenetara egingo dute salto.