Udako atari honetan festaz festa, herriz herri ibiltzeko aukera zabaltzen da. ATARIA irratiak ere parada hori baliatuta Pasahitza saioa estudiotik atera eta plazaz plaza paseatuko du.
Bidaiaren lehen geltokia Anoeta izango da. Eta garraiobidea ez galtzeko modurik onena data eta ordua ondo jasota izatea da: bihar, osteguna, hamaiketan hasita.
MIKROFONO AURREKO PROTAGONISTAK
Bidaiaren gidari Iñigo Terradillos eta Jon Miranda esatariak izango dira. Eta aurrez aurre Korputs festetako protagonistak izango dituzte. Esaterako, Pello Estanga alkatea bertan izango da. Egun horretan bertan protagonismo nagusia izango dutenek ere zer kontatua izango dute ATARIA-ko mikrofonoen aurrean, Anoetako talogileak, izan ere haiek izango dute aurtengoan txupinazoa botatzeko ohorea.
Ez dira hauek Pasahitza-ko kabina zapalduko duten bakarrak. Esaterako, besteak beste, Naroa Urkola eta Jokin Tolosa eragileek festen antolakuntzaz zer kontatua izango dute. Loatzo musika eskolak ere bere tartea izango du. Eta Txomin Azpiroz eta Oier Urkola bertsolariek prestatu duten bertso saioaren berri emateko ardura izango dute. Juan Karlos Otero berriz pala txapelketaz ariko da. Baina informazioaz gain, ezusteko eta oparietarako tartea ere izango da, 11:00etan abiatuta, plazan.
'Pasahitza' irratsaio berezia eskainiko dute bihar Iñigo Terradillosek eta Jon Mirandak, Anoetako festetako muinetik, 11:00etan hasita, 'ataria.eus'-en eta 107.6 fm-ean entzungai
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!