Maiatzaren amaierak ekarri ditu aurten Anoetako Korputs festak. Pasa den asteburu betearen jarraipena izango dute, ofizialki hasi diren jaiek. Suziria, berriz, aurten 25 urte bete dituen Txistulari Taldeak bota du.
Txistulariek gogora ekarri dituzte beraien aurretik taldeak izan dituen kide guztiak. «Eskerrak eman nahi dizkiegu gure irakasle izan ziren Jose Luis, Marga eta bereziki Jabier Sarasari. Beraiek egin zuten lana ez bazen, gaur ez ginatekeelako hemen egongo».
Ondo pasatzeko mezuarekin batera, Gora Anoetako festak oihukatu dute. Eztandarekin batera, danborren burrunba izan da, haurren danborradarekin. Igandera bitartean etenik izango ez duten festei eman diete hasiera.