Goian eta behean euria zela atera dira dantzariak Anoetako plazara. Unai Urkola gaztea izan da aurreskularia eta Anne Jauregi atzeskularia eta tartean adin guztietako anoetarrek osatu dute soka. Urkolak amari dantzatu dio agurra eta Jauregik berriz, Amaiur Luluaga lagunari –biak elkarrekin ariko dira Itsas lapurrak ikuskizunean, arratsaldean–. Publiko artetik bikote bila aritu dira dantzariak eta haiekin batera fandango eta arin-arina dantzatu dituzte. Kalejiran amaitu dute eguerdiko festa.
Ezten Giro taldeak jarriko du erromeri giroa arratsaldean eta taloak ere izango dira salgai gerturatzen direnentzat. Orain arte kalderero egunez egiten zen Dantza-Soka eguna dataz aldatu dute aurten, festa berpizteko asmoz.