Adinez nagusiagoak direnak, iluntzeko freskurarekin gerturatuko dira plaza aldera. Horietako batzuk mozorrotuta. Anoetako eragileek antolatutako saiheski jatearekin batera, Iratzar taldearekin erromeria izango da plazan.
Bihar ere izango da musika gehiago Anoetako jaien barruan. Zopilotes Txirriaos taldearen txanda izango da. Lehenagotik, ordea, 18:00etan play back lehiaketa izango da plazan eta 22:30ean frontoian bertso saioa egingo dute. Maialen Lujanbio, Aitor Mendiluze, Jone Uria, Julio Soto eta Jexux Mari Irazu, Amaia Agirreren esanetara jarriko dira.
Larunbatean, gazteek hartuko dute protagonismoa Anoetan. 18:30etan, gazteen kalejira abiatuko da eta plazan 23:30ean elkarrekin egingo dute dantza. Tartean herri afaria izango da frontoian eta erromeria goizaldera arte, 3 gabe 2 taldearekin.
Asteburuan izango da bestelakorik: larunbatean 17:30ean zaldi lasterketa egingo dute kiroldegi ondoan eta igandean Mikel Oiarzabal eta Andoni Urkolaren omenezko txirrindulari lasterketa abiatuko da 10:00etan.
Jaien azkeneko egunean, igandean, 19:00etan sagardo dastaketa izango da Kuku Elkarteak antolatuta. 21:00etan elizako kanpandorrera igoko dute kukua baina festa luzatzeko asmoa dutenek izango dute aukera. 23:00etatik aurrera Kupela taldea arituko baita plazan.