Asteazkenean hasiko dira Anoetako festak ofizialki baina motorrak berotzen ari dira jada. Koadrilen Eguna izan zen larunbatean eta Dantzari Txiki Eguna ospatu zuten atzo. Kalejiran ibili ziren goizean zehar eta 12:30ean dantza taldeen emanaldia eskaini zuten. Protagonistek jende ugari bildu zuten herriko plazan, baina ez ziren bakarrak izan jendea erakartzen.
Pintxo dastaketa ere egon zen, eta ez nolanahikoa. Jatorri ezberdinetako emakumeek osatutako Guretzako taldea lanean aritu zen 12:00etatik aurrera. Dantzari txiki eguna batetik eta pintxo dastaketa berezia bestetik, anoetarrek goiz borobila izan zuten. Orain zain egotea gelditzen zaie, asteazkenean Kukua jaitsi eta festei behar bezala hasiera emateko.