Benta Aldea erretegiaren inguruan herri kirol jaialdia antolatu dute, etzi. Euskal Festa 12:00etan hasiko da, eta toka txapelketa eta txinga eroaten ariko dira herri kirolariak lehendabizi, erakustaldia eskainiz. 13:00ak iristen direnean, aizkoran hasiko dira lanean Jose Mari Olasagasti, Arria, Alberto, Txapartegi eta Aierbe. Hauekin batera eskualdeko aizkolari beterano bat ariko da lanean, hau da, Joakin Garmendia anoetarra.
Aizkora erakustaldiaren tartean, apustu berezi bat egingo dute Olasagastik eta Garmendiak. Enbor handi bakarra moztu beharko dute bi aizkolariek, baina noski, Olasagastirena bi metroren bueltan ibiliko da. Garmendiarenak metro pasatxo izango du, eta abantaila, beraz, enborrean alde izango du. Ondoren, bazkaria egongo da. Segidan, bertsolarien txanda izango da eta egunarekin amaitzeko erromeria egongo da.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!