Kalderero egunez ospatzen dute Dantza Soka Eguna, Anoetan. Larunbatean eguraldiak asko lagundu ez arren, goizean goiz atera ziren dantzariak baserriz baserri musika eta dantzak eskaintzera.
Eguerdian, urtero moduan, herriko plazan elkartu ziren 60 bat dantzari. Neska eta mutil, guztiek batera egiten dute dantzan. Aurten, Ane Irazusta izan zen aurreskularia eta Olatz Ausin atzelaria. Bakoitzak, berak nahi zuen pertsonari agurra dantzatzeko aukera izan zuten.
Ikusle jendea ere dantzara gehitzen joaten da, eta plaza bete jende aritu zen dantzan. Bazkaria izan zuten ondoren, eta jarraian, festa iluntzera arte luzatu zen Anoetan, kalejira eta Gugaz taldearen erromeriarekin.