Joan den urtean hasi zen herriko emakume talde bat herri kirolak egiteko entrenatzen. Esperientzia gustatu zaie, eta aurten ere jarraipena eman diote taldeari. Gainera, emakume gehiago batu dia taldera, gazteak batik.
Bada, gaurkoan, iaz bezala, entrenamenduak jendaurrera ateratzeko eguna izan dute. Frontoian aritu dira trontzan, txingan, harri jasotzen nahiz gurdiari itzuliak ematen. Eta ikusmina piztu du saioak, frontoia herritarrez bete baita.
Saioa bukatzeko emakumeek eskerrak eman dizkiete lagundu dieten guztiei, bereziki Joseba Irazustari —bera izan zen taldea sortzera animatu zuena— eta Joxe Ramon Iruretagoiena Izeta II.ari —materialarekin eta herri kiroletarako teknikarekin lagundu duena—.