Igandeko ingurutxoarekin batera, askorentzat Ugarteko festak amaitu egiten dira. Izan ere, urtero egitarauan hutsik egiten ez duen ekitaldia da, urteetan atzera eginda ere. Horren adibide dira Ugarteko soziedadeko paretetan orain zintzilik dauden argazkiak. Garai bateko argazkiz osatuta dago erakusketa, eta asko ingurutxoaren bueltakoak dira.
Garaiak aldatu dira, eta baliteke dantza bera ere aldatu izana. Atzo dantzariek gogora ekarri zutenez, historikoki dezente luzeagoa izaten zen dantza, eta, gainera, egunean bitan dantzatzen zuten: bat goizean, eta bestea arratsaldean. Gaurko begiradatik, gehiegizkoa dela diote ingurutxoko dantzariek.
Urtetik urtera, gainera, dantzari berriak erakartzea zaila egiten zaie Ugarteko auzotarrei; batik bat, mutilen kasuan. Hala, emakumeen eta gizonen arteko proportzioan emakumezkoak aise gailentzen dira. Edonola ere, atzo Garikoitz Llobregaten txistu eta danbolin doinuetara makurtu ziren Ugarteko herritarrak, asko egun batez dantzari bihurtuta.
