Errefus eta hondakin organikoen edukiontzietako sarraila elektronikoak berritu ditu Amezketako Udalak, «azken aldian arazo asko» ematen zituztela-eta. Tolosaldeko Mankomunitatearen aholkuei jarraituta erabaki dute sarrailak aldatzea, eta Gipuzkoako Foru Aldundiaren diru laguntza izan dute sarraila berriak erosteko.
Sarrailak aldatu badituzte ere, herritarrek orain arteko txartel berdinak erabiltzen jarraitu beharko dute. Eta oraindik txartelik ez dutenek, udaletxean eskatu ahal izango dute. Beste berritasun bat da aurrerantzean Mankomunitateko hezitzaileak jarraipena egingo diola txartelen erabilerari, eta, horrela, herriko birziklapen tasa hobetzen jarraitu ahal izango dute.
Edozein zalantza izanez gero, herritarrak harremanetan jar daitezke Tolosaldeko Mankomunitatearekin 696 017 371 telefono zenbakian edo hondakinak@tolosaldekomankomunitatea helbide elektronikoan.