Amaitu dituzte Bidegain etxearen aurrealdeko zorua berritzeko lanak. Aurrez hautsita zeuden harriak kendu eta asfaltoa berritu dute; eta bertako ur-hoditeria berritzeko ere baliatu dute aukera.
Udaletik gogora ekarri dute erabilera publikoko eremu bat dela, eta diru publikoarekin ordaindu direla lanak. Zentzu horretan, garajeen aurrealdean kotxeak egotea baimentzen jarraituko dute; baina, ez dute onartuko mahaiak dauden eremuan kotxeak uztea edo «antzeko erabilera pribaturik».
Amiantoaren errolda
Obra bukatu dela jakinaraztearekin batera, herriko udaletik adierazi dute martxoan zehar amiantoaren oinarrizko errolda egingo dutela. Hain zuzen, udala erregistro hori egitera behartuta dago 7/2022 Legea, apirilaren 8koa, Hondakinak eta Lurzoru Kutsatuak arautu eta Ekonomia Zirkularra bultzatzekoaren arabera.
Horretarako, Bureau Veritas enpresaren ibilgailu bat ibiliko da herriko hainbat kale, auzo eta errepidetan; eta lanaz arduratuko diren teknikariek enpresaren laneko arropak izango dituzte.