Iaz bezala, Oier Zubeldia amezketarra eta Irati Zubizarreta beasaindarra izan ziren helmugaratzen lehenak. Zubeldiak 59.51 behar izan zuen 12,20 kilometroko ibilbidea osatzeko, eta Zubizarretak, berriz, 1.16.23. Gizonezkoetan, Zubeldiaren atzetik Aitor Zunzunegi legorretarra (1.01.18) eta Mikel Usandizaga aiarra (1.02.08) iritsi ziren.
Emakumezkoetan Eider Zubeldia amezketarrak gutxigatik ez zuen podiuma zapaldu. Laugarren postua egin zuen 1.19.11 denborarekin, Adirane Peñagarikano urretxuarrarengandik 30 segundora.
Berrehundik gora korrikalarik parte hartu zuten proban. Ibilbide osoan zehar lokatz ugari izan zuten, eta freskura nagusitu zen; hala ere, ateri eutsi zion. Eguraldia goibela izan arren, Trapalata Txarangak giroa alaitu zuen, eta jende ugari joan zen Beasaingo auzora.
Eider Zubeldia, helmuga zeharkatzen. GOIERRIKO HITZA