Amezketako irakurle taldeak Uxue Alberdiren Hetero liburuarekin hasiko du 2026. urtea. Urtarrilaren 15ean egingo dute lehen saioa, eta, ohi bezala, Pernando Amezketarra kultur etxeko jubilatuen txokoan izango da. Urtearen amaiera baliatu dute interesa izan dezaketen herritarrak ekimenera gonbidatzeko.
Urtarrilean hasi eta maiatzera arte egiten dituzte saioak, eta hilabetean liburu bat irakurtzen dute. Hori horrela, guztira, bost liburu lantzen dituzte, eta helburu dute, besteak beste, euskaraz irakurtzeko «ohitura sustraitzea», horren «gozamena albo batera utzi gabe». Hari berari tiraka nabarmendu dute ez dagoela liburua tertuliaren egunerako amaitu beharrik, bakoitzak «bere erritmoa eta denboral librea» dituela-eta.
Hogei urteko egitasmoa
Bi hamarkada daramatzate euskaraz idatzitako liburuak irakurtzen, eta egileak gonbidatzen dituzte tertulietara: «Hor gabiltzanok ez gara jakitun handiak, idazlearen argibideekin asko ikasten eta gozatzen da. Ez da ezer ordaintzen, ez dago izenik eman beharrik eta, batez ere, gauden taldean oso ondo pasatzen dugu». Idazleak tertuliara gonbidatzearen kostu ekonomikoa Amezketako Udalak hartzen du bere gain, arduratuta dagoelako euskal kulturaren hedapenaz eta zabalkundeaz.