Motzak baina biziak izan dira azken egunak ugartearrentzat, hiru festa egun bete-betak izan baitituzte. Atzokoan, parrandari agur esan baino lehen, ohiturazkoa den ingurutxoa dantzatu zuten auzotarrek Ugarteko frontoian. Herri kirol saioaren ondoren, zuri-urdinez jantzirik, azken asteotan entseatutako pausoak jendaurrera eraman zituzten dozena bat bikotek.
Garikotz Llobregaten txistuaren doinura dantzatu zuten haur, gazte eta ez hain gazteek. Helduenek dantza saioa alde batera uzten doazen heinean, belaunaldi gazteagoak gehitzen doaz urtetik urtera. Hori bai, atzokoan neskez osatutako bikote ugari ikus zitezkeen dantzan. Bada, belaunaldi gazteagoetan mutilen presentzia berreskuratzen lana dute aurretik auzotarrek.
