Amezketako azoka azaroaren 9an egingo dute aurten, eta dagoeneko zabaldu dute postua jartzeko izena emateko aukera. Azokan, urtero bezala, askotariko produktuak egongo dira: batetik, barazkiak, frutak, gozoak eta, oro har, jakiak; eta, bestetik, artisautza produktuak. Aurten ere igandez egingo dute, eta 10:30etik 14:30era izango da.
Postua jarri nahi dutenek dagoeneko eskatu dezakete baimena, eta urriaren 31 izango da horretarako azken eguna. Izena emateko eskaera orri orokorra —Amezketako Udaleko web orrialdean eskuragarri— bete behar da, eta bertan adierazi, besteak beste, zein produktu eskainiko den eta postuak argindarra beharko duen ala ez.
Antolakuntzatik adierazi dute, aurten, postu bakoitzean bi mahai jarriko dituztela (bakoitza 1,80 x 0,80 m neurrikoa) eta ez dela «beste aukerarik» onartuko. Hizkuntza irizpideei dagokienez, berriz, errotuluak euskaraz izatea hobetsiko dute; baina elebitan ere jarri ahal izango dira, betiere, lehentasuna euskarari emanda.