Duela aste batzuk herriguneko hainbat errepidetan lurreko seinalizazioa berritu zuten Amezketan. Horren harira gogorarazi dute marra horidun guneetan eta debekatutako beste espazio batzuetan aparkatzeak oztopatu egiten duela oinezkoen, bizilagunen eta mugikortasun urriko pertsonen irisgarritasuna eta segurtasuna.
Zentzu berean gehitu dute debekatuta dagoela, baita ere, zenbait garajeren aurrean aparkatzea. Eta hari berari tiraka nabarmendu dute autobusaren joan-etorriak betiko ibilbidera itzuli direla dagoeneko, eta gidariak askotan topatzen dituztela oztopoak herri barruan, hain zuzen, gaizki aparkatutako ibilgailuak.
Arreta Zubeldianerako errepide zatian
Amezketako Udalak adierazi du Ogi-berriko dendatik Zubeldianerako errepide zatian zebra-bide bat dagoela eta ume askok zeharkatzen dutela gunea; eremu arriskutsutzat jo dute «batez ere» gaizki aparkatutako autoek ikusgaitasuna oztopatzen dutela-eta.
Segurtasuna hobetzeko asmoz, lurreko seinalizazioa egokitu dute eta, horretarako, distantziak handitu eta ikusgarritasuna hobetzeko neurriak hartu dituzte. «Hala ere, jendeak behar ez den tokietan aparkatzen jarraitzen badu, aldaketa horiek ez dute bere helburua beteko. Horregatik, puntu hau bereziki azpimarratu nahi dugu, umeen eta oinezkoen segurtasuna arriskuan jar daitekeelako».
Erreserbatutako aparkalekuak
Era berean, udaletik nabarmendu dute ezinbestekoa dela elbarritasuna duten pertsonentzat erreserbatutako aparkalekuak errespetatzea: «Aparkaleku horiek ezinbestekoak dira pertsona horiek modu autonomoan mugitu ahal izateko, eta horiek okupatzea eskubide urraketa larria da».
Halaber, auto gidariei seinaleak, arauak eta eremu guztiak «zorrotz errespetatzeko» dei egin diete: «Debeku hauek ez betetzeak isunak eta bestelako neurriak ekar ditzake».