Igande honetan, ekainaren 1ean, jokatuko da Jokin Altuna eta Iñaki Artolaren arteko buruz buruko finala. Amezketako Udalak autobusak antolatu ditu finala ikustera joateko eta bihar, hilak 28, izango da izena emateko azken eguna. Herriko tabernetan daude zerrendak jarrita eta bertan eman behar da izena.
Goizez edo arratsaldez joateko aukera izango da. Autobus bat 10:00etan aterako da Beartzanako aparkalekutik eta bestea 15:00etan leku beretik. Udaletik azaldu dutenez, goizeko autobuserako 25 pertsona baino gutxiago apuntatzen badira, ez da autobusa irtengo. Finala amaitutakoan abiatuko dira bi autobusak Amezketarantz. 5 euro ordaindu beharko da pertsonako autobusera igotzerakoan eta kopuru justua eramaten saiatzea eskatu du udalak.
Bestalde, buruz buruko finalaren ondorenerako, Amezketako Larrunarri pilotalekuan afaria antolatu dute. Bi menu egongo dira, adinaren arabera: haurren menua 15 eurokoa izango da, eta helduen menua 35 eurokoa. Txartelak salgai daude Arkaizpe jatetxean, eta erosteko azken eguna osteguna izango da, hilaren 29a.
