Joseba Larreta 'Latu' amezketarra atzo zendu zen 38 urte zituela. Kirol arloan boluntario moduan aritzen zen amezketarra, esaterako, Tolosa CF gizonezkoen futboleko lehen taldeko ordezkari moduan partidetan. Sare sozialetatik klubak doluminak adierazi ditu: «Doluminik beroenak senideei, lagunei eta, gu bezala, berarekin bidea partekatzeko pribilegioa izan zuten guztiei. Gure itsasontzi urdineko tripulanteetako bat!».
Herriarekin lotutako hainbat ekitalditan boluntario moduan parte hartzen zuen. Honela, Ehunmilak mendi lasterketan boluntario bezala aritzen zen Larreta, azken urteotan Amezketako gunearen koordinatzaile gisa. «Parte hartzaileek asko eskertzen dute boluntarioen lana. Niri horrek betetzen dit, eta horregatik jarraitzen dut urtero», azaldu zuen Larretak berak, 2016an egindako elkarrizketa batean. Pilotazale amorratua zen ere, eta Jokin Altunaren jarraitzaile sutsua.
Antzezlea, herrian bertan
Amezketan festa eta kultur ekitaldiak izaten direnean paper berezia bete izan du Joseba Larretak, asko antzerkiari loturik. Esaterako, Amezketako San Bartolome festak ixteko egiten den elbiaren entierroan apaiz papera jokatu izan du, ekitaldia bera gidatuz. Gainera, Amezketako antzerki taldearen partaide ere bazen, eta eskainitako antzezlanetan parte hartu izan du hasieratik. Adibidez, Gerra omen zetorrek! Ederrak egin dizkinagu! antzezlana.
Hileta elizkizuna bihar, asteartea, egingo da, 17:30ean, Amezketako San Bartolome parrokian.