Amezketako Zumadi eskolako LH-5 eta LH-6 mailetako ikasleek Bedaioko elkartean egingo dute astero eskolan egiten duten bertso saioa. Bertan, herriko bizilagunekin partekatuko dute «bertsolaritzarekiko zaletasuna» zein ikasketa-prozesua; eta, horrela, belaunaldi ezberdinen arteko harremanak sendotuko dute.
Eskolako bertso saioetan Bixente Gorostidi izaten dute irakasle eta horretan arituko da Bedaion ere. Aurrez Ugarte auzoan egin zuten zita, eta, bertan, gonbidatu berezi bat ere izan zuten: Todor Azurza. Azurza orain gutxira arte Boisen (AEB) bizi izan da, eta bere ekimenez eta bitartekaritzaz hasi zuten Zumadiko ikasleek Boiseko bertso eskolarekin harremana.
Bihar berriz ere espero dute Azurzaren bisita, eta «ilusio handiz» jasoko dute ikasleek, irakasleek eta herritarrek. «Esperientzia aberasgarri hau belaunaldi arteko ezagutzaren transmisioan eta herri-giroaren sustapenean urrats garrantzitsua izaten ari da», adierazi dute Amezketako Udaletik.