28 minutu pasatxo iraun ditu final-erdiak Atano IIIa frontoian, Donostian. Erakustaldia egin du Altuna III.ak. «Txoratzen nago, finala iristera zaila da, kosta egiten da eta iristen zarenean poza ematen dizu». Seigarren finala izango du amezketarrak eta buruz buruko laugarren txapelaren bila joango da Bilbora, ekainaren 1ean.
Bigarren final-erdia, bihar jokatuko da Gasteizko Ogeta pilotalekuan. Iker Larrazabalen aurka arituko da Iñaki Artola alegiarra. Gaurko partida amaitutakoan zera esan du Altuna III.ak: «Iñakik irabaztea nahi nuke, gertukoa dut eta biak finalera joatea ederra izango litzateke».
