Urte honetarako 1.754.785 euroko aurrekontua izango du Amezketako Udalak. Aurten izango dituen diru sarrerei dagokienez, % 72 jasoko du Gipuzkoako Foru Aldundiko Udal Finantzaziorako Funtsetik eta beste administrazio publikoetako dirulaguntzetatik; % 25 udal zerga eta tasetatik, eta % 3 bestelako sarreretatik.
Aipatutako kopuru horretatik 438.696 euro bideratuko ditu Amezketako Udalak inbertsioak egiteko; eta, aurten, hainbat azpiegitura eta zerbitzu hobetzeko lanak, eta landa eremua identifikatu dituzte, besteak beste, lan lerro gisa.
Azpiegituran zenbait lan-lerro
Batetik, aparkalekuen arloan egingo dituzte inbertsioak. 2022an eskola inguruan aparkaleku berri bat egin zuten sartu-irtenetan sortzen ziren arazoak konpontzea helburu eta, horretarako, udalak alokairuan hartu zuen lursail bat. Garai hartan Hezkuntza Sailarekin eskola lekuz aldatzea jorratzen ari zen udala, Ura Agentziak ez zuelako ontzat ematen ikastetxea bertan berritzea, uholdegarritasun arriskuagatik. Orain, ordea, udalaren esanetan «uholdegarritasun legeak aukera ematen du eskolak dauden lekuan berritzeko», eta parkalekuari ere «behin-betiko irtenbide bat» eman nahi diote. Bada, horretarako 20.000 euro aurreikusi dituzte. Ez da, ordea, eremu horretan egingo duten inbertsio bakarra, hain zuzen, 50.000 euro bideratu baitituzte Zumadi eskolan «hobekuntzak» egitera.
Aparkalekuen gaira itzulita, Ugarte auzoan «arazo larria» dagoela uste dute udalean, eta beste 20.000 euro gorde dituzte horretara bideratzeko. Bestalde, auzo horretako elkartean parrilla berria jartzeko 5.000 euro ere aurreikusi dituzte. Azpiegituren arloan jarraituta, 87.000 euro aurreikusi dituzte bidegorriko falta den zatia ordaintzeko; horrez gain, espaloi asko puskatuta daudela jabetu dira eta horiek segurtasun arazoak sortzen dituztela identifikatu dutela-eta, beste 20.000 euro ere jaso dituzte horiek konpontzeko.
Landa-eremuan inbertsioak
Mikel Arteaga alkateak adierazi du eurentzat «garrantzia nabarmena» duela landa eremuak, eta egoera hobetzeko lanean jarraituko dutela. Hori horrela, arlo horretan hainbat inbertsio egingo ditu Amezketako Udalak, besteak beste, 70.000 euro jaso ditu baserri bideak konpontzeko. Hari berari tiraka, 10.000 euro bideratuko dituzte Ondarreko langara eta Larrondora doazen bideak hobetzeko; eta, horrez gain, Larrondon beste 25.000 euro ere inbertituko dituzte Gipuzkoako Foru Aldundiko Goilarre programaren bitartez. «Hoditeria berritzen jarraituko dugu, eta Arteako eremuan depositu eta aska berri bat ere jarriko ditugu». Azpiegitura ez da izango landa-eremuko inbertsio bakarra, hain zuzen, 25.000 euro aurreikusi baitituzte lurretako mugen digitalizazioarekin jarraitzeko.
Aipatutako lan-lerroez gain, 20.000 euro bideratu dituzte gimnasioko makinak berritzeko, eta beste 8.000, Beltzaren plazaren ondoko parkean falta diren barandak berritzeko.
Etxebizitza, erronka esku artean
Etxebizitzaren aferaz jabetzen direla nabarmendu du Arteagak eta arlo horretan lanean dabiltzala ere zehaztu du: «Jauregiko eremuan etxebizitzak egiteko lanean ari gara. Ez du inbertsio eskatzen, promotore pribatu bat dagoelako eta berak sustatuko duelako plan partziala». Hari berari tiraka, toki horretan 78 etxebizitza aurreikusten dituztela ere gaineratu du. Horrez gain, alkateak azaldu du elkarlanean ari direla Etorlur Gipuzkoako Foru Aldundiaren sozietatearekin zaharkituta dauden eraikinak berritzeko eta merkaturatzeko.
Inbertsioen berri ematearekin batera, alkateak gaineratu du «egoera ekonomiko ona» duela Amezketako Udalak eta jasotako dirulaguntzen zerrenda bat ere argitaratu dute web orrialdean. Hari berari tiraka, jakin-mina izanez gero udaletxera bertaratzera gonbidatu ditu herritarrak: «Diruaren kudeaketak garbia izan behar du eta, horregatik, edonori behar diren azalpen guztiak emateko prest gaude. Garrantzitsua da herritarrek aukera hori izatea».