Amezketako Udalak eta Aralareko Amezketako Loidi baserriak antolatuta, Muxal festa gastronomikoa egingo dute Amezketan, irailaren 14an. Baserria ta Amezketa elikadura baino gehiago lelopean, jan-edana, tertulia eta musika izango dira ekimeneko osagaiak.
Amezketako plazan sei postu gastronomiko jarriko dituzte: Pello Zabala gunea, Ama, Aralareko, Bertakoteka, Zidernaut eta Balerdipeko Erleak. 18:00etan zabalduko dute festa, eta 18:15ean hasita tertulia egingo dute ondorengoen artean: Javi (Ama jatetxea), Uxue (Aralareko), Inaxio (Balerdipeko) eta Txarli (Zidernaut). Ondoren, 19:00etan hasita, musika izango da protagonista. Hain justu, Bidenabar taldearen kontzertu akustikoa izango da.